التغذيه السليمه للجراوي والقطط الصغيره من عمر الولاده وحتي النضوج

أتكلمنا قبل كده عن العنايه بالكلبه أو القطه الحامل وأفضل الأغذيه وأهم أحتياجاتهم في فتره الحمل النهارده هنتكلم بأستفاضه عن تغذيه الجراوي والقطط الصغيره وهنذكركم تاني  بالأكل المسموح لهم بعد الفطام والأكل اللي ممكن يعمل لهم مشاكل بالتفصيل

بعد الولاده بساعه المفروض يكون القطط الصغيره والجراوي يكونوا بدأ يشربوا لبن الكولستروم اللي بيتفرز من حلمات الكلبه والقطه اللي لسه والده, اللبن دا مهم جدا عشان بيحتوي علي أجسام مضاده لمعظم الامراض اللي أتعرضت لها الام وبتحصن بيها القطط والجراوي بعد الولاده , مهم جدا ان يتم شرب الكولستروم دا خلال ال 48 ساعه الاولي من العمر  كحد أقصي  قبل ما يتحول لبن الكولستروم للبن العادي 

ومهم جدا لصاحب الكلبه او القطه ان ياخد باله بعد الولاده مباشره من طريقه تعامل الام مع الجراوي او القطط الصغيره لان في بعض الأمهات اللي بترفض أرضاع المواليد  خاصه لو دي الولاده الاولي لها وفي بعض الأمهات بيكون اللبن اللي بيفرز من حلماتها غير طبيعي بسبب التهاب في الحلمه أو غيره ومهم هنا انه لازم نحاول نشوف اللبن المفرز من الحلمه ونتاكد ان ريحته طبيعيه ولونه طبيعي بمعني انه ميكونش له ريحه تزنخ او اي ريحه غريبه عن ريحه اللبن وبالنسبه لشكل لبن الكولستروم فبيكون كثيف  عن اللبن اللي بنشربه
لو مرت ساعه والجراوي او القطط لسه مقربتش من حلمه أمهاتهم لازم أخدهم واحد واحد وأحطهم علي الحلمات ولو عدد المواليد أكبر من عدد الحلمات لازم أبدل بينهم كل شويه لحد ما الأم بنفسها تعرف تتعامل معاهم

مهم جدا كمان بعد الولاده مباشره من تنضيف فتحات التنفس عند المواليد من المخاط وتجفيف الجسم بشكل كويس جدا ويكون في مكان دافي للام والمواليد عشان يناموا فيه

ملحوظه : لو لاحظنا أن لبن الام كميته مش كفايه ممكن نبتدي ندي فيتامينات مدره للبن زي هيربانا بعد الرجوع للطبيب البيطري لتحديد الجرعه
طب لو رفضت الام أرضاع المواليد او حصل التهاب في الحلمات منع الرضاعه 
الطبيعيه او سبب تاني أعمل أيه ؟

هنا بيجي دور الرضاعه الصناعيه ببديل لبن الام والبدائل التجاريه في منها البودره وفي 
منها اللبن السائل المخصص للقطط او للجراوي والافضل طبعا انه نختار اللبن البورده وخاصه ماركه رويال كنين زي ما قولنا قبل كده انها متوازنه بشكل كفايه سواء للجراوي او القطط 

وبيكون مكتوب علي العلبه من الخلف عدد مرات الرضاعه وكميه البودر اللي هنستخدمها والناس اللي هتلجأ للرضاعه الصناعيه دي لازم تختار نوع اللبن بشكل كويس وتبقي مواظبة علي الاوقات بشكل كويس لان لو قل عدد الرضاعات او لو زاد عن المعدل الطبيعي ممكن ياثر علي صحه المولود بشكل سلبي

كمان لازم الشخص اللي هيكون مسئول عن أرضاع المواليد  يكون علي درايه كافيه

 بأنه القطط والجراوي بيكونوا  في أول شهر من العمر عندهم مشكله في عمليه الأخراج فلازم يهتم بعد كل عمليه أرضاع أنه يحاول يدلك منطقه الاخراج أو فتحه الشرج بلطف عشان يتم الأخراج بشكل سليم

القطط الصغيره سواء هتتفطم من أمها او لو بترضع صناعي ممكن تتفطم من بدايه الاسبوع التالت من العمر ولكن يفضل أنه ننتظر حتي تم شهر ونص أو شهرين قبل ما نبدأ في فطامها 

عند شهر ونص لشهرين ممكن تبدأ القطط تاكل ال سوفت فود او canned wet food
بس مهم أنه نخلطه بالميه ونقلل كميه الميه تدريجيا لحد ما تاكل السوفت فود بيور من غير ميه
وعند عمر 10  ل 12 أسبوع ممكن نبتدي ندي دراي فود للقطط من غير ما يكون مخلوط بميه 

بالنسبه للجراوي ففطامها مشابه للقطط عند عمر ال 3 او أربع اسابيع ممكن أفطمهم ولكن يفضل فطامهم عند عمر 7 أو 8 أسابيع

في حاجات لازم أنتبه عليها في أول شهر من العمر أولها أن المواليد كلها تكون بترضع بشكل متساوي وأنهم يكونوا بيتخلصوا بشكل صحيح من الأخراج بتاعهم

ثانيا أن درجه حراره المولود تكون طبيعيه لو حصل ولاقيت مثلا أطراف جرو او قطه صغيره ساقعه لازم أركز أوي في أني أرفع له درجه حراره جسمه خاصه وان الجراوي في العمر دا مبتكونش عندها كنترول كفايه علي تنظيم درجه حراره جسمها بنفسها
هارفع درجه حراره الجسم أزاي ؟
ممكن أجيب قربه ميه دافيه وانيم الجرو او القطه عليها مع ملاحظه ان تكون القربه دافيه مش سخنه عشان متحرقش جلدهم
او ممكن بطريقه التدليك العاديه باني أدلك جسمهم بأيدي لحد ما أحس ان درجه حراره جسمهم رجعت للطبيعي
أو عن طريق وضع الجراوي علي soft bed
ودا بيتباع في محلات أكسسوار الحيوانات  وأضئ لمبه صفرا علي أرتفاع حوالي متر عشان توصلهم التدفئه بشكل سليم من غير ما تحرقهم

طريقه الفطام لازم تكون تدريجيه بمعني أن ممكن أسيب المولود يرضع من أمه أو ياخد بديل اللبن لو بيرضع صناعي وفي نفس الوقت أبتدي أدخل له سوفت فود علي مدار اليوم عشان اعوده عليه
وفي طريقه أكل معينه كانت بتجيب نتيجه كويسه مع الجراوي والقطط كمان
بنخلط بديل اللبن أو اللبن منزوع الدسم  مع مكعب نستو ودراي فود مطحون مع سيريلاك مرحله أولي ويتخلط كويس وأديه للجرو او القطه
الخليط دا طعمه مستحب للحيوانات وبيكون شبه متوازن

ملاحظه : كميات الأكل لازم تكون متناسبه ومأكلش كميات كبيره في وجبه واحده

مع مرور الوقت بنقدر نغير السوفت فود بالدراي أو نقدر ندخل الخضروات في الوجبه مع التركيز علي عناصر أساسيه لازم يتوافروا في الوجبه وهما 

البروتين
الكربوهيدرات
مصدر للفيتامين والمعادن

ومثال علي البروتين هو قطعه لحمه أو فراخ كبروتين حيواني وكالفول كبروتين نباتي وهنا لازم أخد بالي من الأكل المسموح والأكل اللي ممكن يعمل مشاكل زي الفول * البقوليات عامتن بتسبب غازات وأنتفاخ في البطن وبتتعب الحيوان لو كميتها كبيره في الوجبه *
مثال علي الكربوهيدرات هو العيش سواء بلدي أو فينو وزي الارز والمكرونه والبطاطس والبطاطا

مثال للفيتامينات والمعادن هي الخضروات ولازم هنا أهتم بدور الجزر في تغذيه الحيوانات الجزر زي ما قولنا قبل كده بيمنع الأسهال وممكن أديه كعلاج طبيعي للاسهال غير فوايده التانيه زي أحتوائه علي فيتامين سي المقوي للمناعه مع فيتامين أ و فيتامين ك

مع نسبه عاليه من مضادات الأكسده غير أنه مفيد للقلب ومحسن للنظر  

ممكن كمان أدي الجزر المقطع شرايح للكلب كتريت أو مكافأه له لو أحسن التصرف

وعكس الجزر بلاقي الكوسه خضار ممكن يسبب اسهال للحيوانات فأقدر أضيفه للأكل في حالات الأمساك ك ملين طبيعي

البروكلي كمان من الخضروات المفيده جدا للكلاب والقطط .. بيحتوي علي مواد مقاومه للأورام والسرطانات وبيحسن وظائف القلب والجلد وبيساعد الجسم علي التخلص من السموم

بالنسبه للفواكهه المفيده والغنيه بالفيتامينات والمعادن فنزلناها لكم قبل كده في البوست دا :
https://www.facebook.com/onlinevets/posts/160733780930288

والأكل الممنوع هنختصره تاني في الأكل المسبك سواء بيحتوي علي زيوت أو سمنه والأكل اللي بيحتوي علي ملح أو توابل دا ممنوع للجراوي والقطط 

الأكل اللي بيحتوي علي بصل وتوم بيسبب خطر علي صحه الحيوانات وتقدروا ترجعوا للمقال اللي نزلناه قبل كده :

https://www.facebook.com/onlinevets/posts/160847004252299

الشيكولاته ممنوعه ومسببه  للتسمم سواء في القطط والكلاب بنسب بتختلف حسب نوع الشيكولاته :
https://www.facebook.com/onlinevets/photos/a.146553829014950.1073741828.139512573052409/154770908193242/?type=3&theater

أخر ملحوظتين قبل ما ننهي المقال بتاعنا هو عدد الوجبات  المفروض أطعامها للجراوي والقطط من أول الفطام لحد النضوج
ودي بتتلخص في :
بالنسبه للجراوي
  أربع أو خمس  وجبات من وقت  الفطام سواء هيكون عند عمر الشهر ونص أو الشهرين لحد ما يتم 3 شهور من العمر  ومن 3 شهور لست شهور تقل الوجبات لتلات وجبات  مع ملاحظه ان يكون معدل نمو الجراوي  في المعدل الطبيعي
بعد الست شهور ممكن أدي وجبتين فقط وبعد مرور سنه في ناس بتدي  وجبه واحده يوميا ودي لا تفضل عشان ما يحصلش التفاف للمعده بسبب الكميه المفاجئه اللي هتدخلها بعد 24 ساعه متوقفه عن العمل فيستحسن لو هندي  أكل فريش أنه نخليها وجبتين أو لو هندي دراي فود فهنلتزم بالمكتوب علي العلبه

بالنسبه للقطط :
  أربع أو خمس  وجبات من وقت  الفطام سواء هيكون عند عمر الشهر ونص أو الشهرين لحد ما تم 3 شهور من العمر  ومن 3 شهور لست شهور تقل الوجبات لتلات وجبات  مع ملاحظه ان يكون معدل نمو القطط في المعدل الطبيعي 
بعد الست شهور ممكن أدي وجبتين لو هندي  أكل فريش  أو لو هندي دراي فود فهنلتزم بالمكتوب علي العلبه 
والأفضل أني ما أسبش الأكل طول اليوم قدام القطه عشان اتجنب أنه يتاكسد اويفقد ريحته و قيمته الغذائيه  أو أن ينمو عليه أي فطر ويضر القطط

عدد الوجبات دي تقديري ممكن يختلف من مربي لتاني بس المهم أنه ميحصلش أختلال في توازن الوجبات وكميتها

النقطه الأخيره هي المسكنات البشري والمخفضات اللي بنستخدمها في حالات أرتفاع الحراره خاصه في أول شهور من العمر
نلخصها في الادويه المحتويه علي البارسايتمول والايبوبروفين ودول أشهر الادويه المستخدمه وزي ما أتكلمنا عنهم بالتفصيل أنهم ممنوعين تماما بسبب تسببهم في تسمم للكلاب والقطط
التسمم بالبارسيتمول :
https://www.facebook.com/onlinevets/photos/a.146553829014950.1073741828.139512573052409/169819073355092/?type=3&theater
التسمم بالايبوبروفين :
https://www.facebook.com/onlinevets/posts/176330002703999


أتمني المقال يكون مفيد لكم ويا ريت متنسوش قراءه جداول التطعيمات الخاصه بالكلاب والقطط :
التطعيمات الخاصه بالكلاب :
https://m.facebook.com/story.php?story_fbid=157598174577182&id=139512573052409

التطعيمات الخاصه بالقطط :
https://www.facebook.com/permalink.php?id=139512573052409&story_fbid=155784018091931


المراجع اللي أتكتب منها المقال :
http://www.1800petmeds.com/education/how-to-feed-puppies-kittens-33.htm

http://motherandpuppies.royalcanin.co.uk/from-nursing-to-weaning/week-by-week-from-birth-to-weaning

http://pets.webmd.com/dogs/weaning-puppies-what-do?page=2

http://www.purina.com.au/kittens/feeding/weaning

فيروس الديستمبر في الكلاب : أعراضه والوقايه منه

الديستمبر هو مرض فيروسي يصيب الكلاب وخاصه في العمر الصغير والكلاب الكبيره اللي متحصنتش  وبيتنقل بسهوله من 

الكلاب المريضه للكلاب السليمه وبيسبب نسبه وفيات عاليه في الكلاب خاصه وانه زي فيروس البارفو ملوش علاج .

طريقه أنتقال الفيروس بين الكلاب :

 أما عن طريق هواء ملوث بنفس كلب مريض او عن طريق التعامل بشكل مباشر مع أطباق الاكل والشرب ومكان النوم اللي بيتواجد فيه الكلب المريض أو حتي تواجد الكلاب السليمه قرب مكان فيه دم  او لعاب ملوث بالفيروس 

أعراض المرض :بيدخل الفيروس لداخل جسم الكلب وبيتكاثر في الغدد الليمفاويه  لمده أسبوع تقريبا وبعدها بيبدأ يصيب الجهاز التنفسي والجهاز الهضمي وفي النهايه بيكون وصل للجهاز العصبي

أصابه الجهاز التنفسي بتظهر علي الكلب المريض علي شكل عطس وكحه جافه تتحول لكحه مفرزه والتهاب رئوي لو حصل اصابه بكتريه ثانويه  ونزول أفرازات مخاطيه من العين والأنف مع أحمرار في العين وحمي شديده بتوصل ل 40.5 درجه  وهنا ناس كتير بتفتكر ان الكلب جاله  فيروس أنفلونزا لان الاعراض بتكون  قريبه جدا في الوقت دا باعراض البرد  خاصه لو فصل الشتاء 

 * ملاحظه انه ممكن عرض يظهر في كلب بشكل واضح وميظهرش في كلب تاني اتصاب في نفس الوقت بالفيروس *

بعد وقت قصير  جدا بتبدأ أعراض الجهاز الهضمي تظهر وبيبدأ فيروس الديستمبر يعبر عن نفسه في شكل فقدان للشهيه مع  اسهال وترجيع  والاسهال في أغلب الحالات بيكون مدمم * ودا عرض بيخلي معظم الاطباء البيطرين يعملوا أختبار البارفو و أختبار الديستمبر فورا عشان يأكدوا اصابه الكلب ويعزلوه عن باقي الكلاب السليمه *
وبنقول هنا انه المرضين البارفو والديستمبر قريبين اوي من بعض في الاعراض اللي بتصيب الجهاز الهضمي ومتشابهين في طريقه العلاج خاصه وان الاتنين علاجهم بيعتمد علي علاج لكل عرض وملهومش علاج مخصوص

في النهايه لو كان تشخيص الكلب أتاخر بيدخل في مرحله اصابه الجهاز العصبي .. الفيروس بيوصل للمخ والحبل الشوكي وبتظهر تشنجات عصبيه وممكن يتبعها شلل لو الاصابه متشخصتش بدري أو ينتهي بالوفاه

في بعض الحالات بيسبب الفيروس زياده سمك بطانه القدم عند الكلاب او بمعني اخر زياده تقرن الطبقه الخارجيه لباطن القدم Foot pad Hyperkeratosis
واحيانا وجود طبقه سميكه علي الانف من الخارج  ودا بيكون عرض مميز للديستمبر 

الأفضل اول ما يحصل أي شئ غريب لكلبي اني اخده للعياده البيطريه وما استناش خاصه وان معظم الامراض الفيروسيه بيصعب معالجتها كل ما عدا وقت علي الاصابه وكل ما زاد الموضوع بدخول اصابه بكتريه ثانويه مع الفيروس

 
تشخيص المرض :

عن طريق الأعراض وعن طريق فحص الطبيب البيطري للكلب وأخذ عينه من برازه وتحليلها بأختبار الديستمبر اللي بقي موجود
حاليا   في معظم العيادات البيطريه وبقي في المتناول ..
ملحوظه : في بعض الاحيان الاختبار بيدي نتيجه سلبيه ويكون الحيوان متصاب فالافضل تكرار الاختبار تاني بعدها بفتره لو الاعراض لسه موجوده

 غير تحليلات تانيه معمليه ممكن يطلبها الطبيب المعالج عشان يقدر يشخص لاي مرحله وصلت الأصابه 

ملحوظه : مش كل اسهال مدم بيبقي اصابه بالبارفو او الديستمبر  ومش كل قئ مع أسهال وفقد للشهيه يعتبر مشخص لمرض البارفو  او مرض الديستمبر زي ما قولنا قبل كده .
الافضل في حاله شك ان الكب مصاب اخد عينه من برازه وتتحلل في العياده البيطريه   

الوقايه من الديستمبر :

أولا :  بما أنه مرض بيجي  أكتر للجراوي قبل عمر ال 3 شهور .. فالأفضل تطعيمهم عند عمر ال 6 أسابيع وبعدين تكرار التطعيم مرتين كمان بفارق 3 اسابيع بين كل جرعه لضمان وقايه الجرو من الفيروس

ومنع الجراوي اللي لسه واخده التحصين من الاختلاط بالكلاب الاخري علي الاقل لمده اسبوعين بعد اخر جرعه من التحصين 

* لان مناعه الجرو هتكون لسه ضعيفه وهيسهل انتقال الفيروس ليه *

الرجاء مراجعه جدول تطعيمات الكلاب بالمدونه :

 http://online-vetclinic.blogspot.com.eg/2015/08/blog-post_29.html

ثانيا : تعقيم أماكن وجود الكلاب بشكل دوري وخاصه لو حصلت اصابه  .. تعقيم كل شئ في مكان  وجود الكلب المصاب ومنع أختلاطه مع الكلاب الاخري لحد ما الطبيب البيطري يأكد انه بقي سليم تماما ومش خطر علي الكلاب التانيه
 

 

 ثالثا : الأفضل تطعيم الكلبه قبل أجراء عمليه التزاوج بفتره  لضمان سلامتها وسلامه الجراوي 

 

 رابعا : غسل الايدين كويس جدا بعد ملامسه  أفرازات  الكلاب عشان امنع اصابه الكلاب الاخري لو كان الكلب مريض ولسه مظهرش عليه  الاعراض

خامسا : في حاله الطوارئ لدواعي السفر وغيره  وترك الكلب لمده كم يوم في استضافه عياده , الافضل اني اطلب انه يكون في مكان معزول عن باقي الكلاب في العياده وأتاكد من ان العياده بتعقم اقفاص الكلاب بشكل دوري عشان اتجنب اني ارجع من السفر والاقي كلبي مصاب 

علاج الديستمبر :

عشان الموضوع يبقي واضح حالات كتير من الديستمبر زي البارفو بالظبط  في الجراوي بتنتهي بوفاه الجرو .. بس في حالات تانيه ودي قليله بتقدر تتغلب علي المرض

بروتوكول العلاج هيكون عباره عن علاج لكل عرض  Symptomatic treatment

 بمعني انه مفيش لحد دلوقت دواء مخصص لمعالجه المر ض بس العلاج بيكون حسب ظهور العرض  

 يعني  محاليل في الوريد لمعالجه الجفاف اللي هيسببه المرض مع أدويه لمنع الاصابه البكتيريه 

وطبعا أدويه ترفع المناعه زي الايميولانت وفيتامين سي 

 فيتامين ك عشان النزيف وأدويه لمعالجه الأسهال 

وحقن لوقف الترجيع وغيره .. الطبيب البيطري وحده هو اللي هيقدر يقرر اي نظام للعلاج أفضل في حاله الكلب 

أتمني الموضوع يكون أفادكم لأي أستفسارات الرجاء التواصل معنا علي صفحتنا علي 

الفيسبوك او صفحتنا بالمدونه  :)

المراجع اللي أتكتب منها المقال :

http://pets.webmd.com/dogs/canine-distemper

http://www.petmd.com/dog/conditions/respiratory/c_dg_canine_distemper

https://www.vetinfo.com/bloody-diarrhea-in-dogs.html

الأيبوبروفين سام أم أمن للقطط والكلاب ؟!

أيه هو  الأيبوبروفين ؟ 

 الأيبوبروفين هو دوا بشري بنستخدمه كمخفض للحراره وكمسكن موجود بأسماء تجاريه كتير زي أقراص البروفين 200 و 400 و 600 وموجود في أدويه شرب كتير للأطفال زي البروفين والايبوفلام

هل هو أمن للقطط والكلاب ؟ وأيه اللي بيحصل لما قط او كلب ياخده كعلاج ؟
معظم مربي القطط والكلاب بيستسهلوا أنهم يدوا الأدويه الموجوده في البيت للقطه او الكلب خاصه لو الحيوان تعب بليل وبقي صعب عليهم انهم ياخدوه لطبيب بيطري يكشف عليه بس المشكله انه أدويه كتير بنفكر احنا انها أمنه للقط او الكلب وتكون هي سبب مشاكل كتير لهم زي الباراسيتامول اللي أتكلمنا عن أضراره قبل كده

لقراءه موضوع التسمم بأدويه الباراسيتامول الرجاء الضغط علي الرابط التالي : 

http://online-vetclinic.blogspot.com.eg/2015/09/blog-post_6.html

وزي الأيبوبروفين اللي يعتبر دواء خطير جدا للقطط والكلاب ببساطه هو بيكسر أنزيم بيحمي جدار المعده والأمعاء أسمه ال
 CycloOxygenase or COX enzyme
كمان الأنزيم دا مسئول عن تدفق الدم بمعدل طبيعي للكلي عشان تقوم بوظيفتها بشكل مظبوط غير أنه مسئول عن الصفائح الدمويه وتجلط الدم بشكل طبيعي

عشان كده لما بتتاخد جرعه زياده من الايبوبروفين للقطط او الكلاب الاعراض اللي بتظهر بتكون كالتالي :
نتيجه تاثيره علي جدار المعده والأمعاء بيتسبب في حدوث ترجيع او اسهال ممكن يكون مدمم لو حصل تقرح لجدار المعده
والحيوان بيقل معدل أكله مع غثيان وفقدان للوزن بشكل واضح في بعض الحالات

ملحوظه :
ممكن  الكلاب اللي أخدت التركيزات القليله أوي من الدوا  زي 5 مجم لكل كيلو من وزن الحيوان ميحصلش لها  تسمم او ميظهرش أعراض للتسمم لكن في تركيزات ال 400 وال 600 لكل كيلو من وزن الحيوان أتسجلت نسبه وفيات عاليه في الحالات
اللي تم أجراء الأختبارات عليها

نتيجه تأثير الايبوبروفين علي الكلي فبيأدي الي فشل  في أداء وظيفتها وممكن يظهر أما تبول كتير وزياده في شرب الماء  او العكس يقل معدل التبول بشكل غير طبيعي
وتأثير الدوا علي الصفائح الدمويه ممكن يسبب سيوله ويمنع الدم أنه يتجلط مع حدوث غيبوبه ووفاه في الحالات المتقدمه من التسمم 

التشخيص :
بيكون عن طريق صاحب الحيوان اللي بيقول أنه ادي الدوا دا لكلبه وقطته وبعدين لو الجرعه كانت كبيره لا قدر الله يبقي عن طريق ظهور الأعراض والفحوصات اللي هيطلبها الطبيب البيطري

العلاج :
لو لسه الدوا متاخد من فتره صغيره ممكن الطبيب البيطري يحاول يعمل غسيل للمعده ويخرج الدوا


وطبعا زي ما قولنا قبل كده في حالات التسمم وتوافر طبيب بيطري قريب يكون مستبعد بادوب قرص فحم  اللي موجود في الصيدليه البشري باسم 
eucarbon tablets
في معلقتين ماء وادي معلقه لكل  كيلو من وزن الحيوان عشان يمنع أمتصاص الماده السامه ويظبط حركه المعده 

او بادي عسل أبيض مخلوط بمعلقه لبن عشان يغطي جدار المعده ويمنع أمتصاص الدوا

في حالات انه يكون عدا وقت طويل علي تناول الدوا ودخلنا لا قدر الله في حاله التسمم الواضحه والكلي أتاثرت هنا لازم هيتعلق محاليل وتتاخد ادويه تمنع الترجيع او يحصل تدخل جراحي لو قرحه المعده زادت وحصل خرق في جدارها


لقراءه موضوع التسمم بالشيكولاته في الكلاب والقطط الرجاء الضغط علي الرابط التاالي :
http://online-vetclinic.blogspot.com.eg/2015/08/blog-post_26.html

لقراءه موضوع التسمم بالتوم والبصل في الكلاب والقطط الرجاء الضغط علي الرابط
 التاالي :
http://online-vetclinic.blogspot.com.eg/2015/09/blog-post_50.html


المراجع اللي أتكتب منها المقال :
http://www.merckvetmanual.com/mvm/toxicology/toxicities_from_human_drugs/analgesics_toxicity.html

http://www.petmd.com/cat/conditions/poisoning-toxicity/c_ct_ibuprofen_advil_poisoning_in_cats?page=2

http://www.petmd.com/dog/conditions/poisoning-toxicity/c_dg_ibuprofen_advil_poisoning_in_dogs

https://www.petinsurance.com/healthzone/pet-articles/pet-health-toxins/Toxic-Medications-for-Pets.aspx

we were having fun @ the clinic with Loli ;)

Obesity in dogs and cats

obesity in dogs and cats can lead to many diseases .. puppies and kittens who are looking always for food probably they will gain weight in short time and by then the big problems will be knocking your door as for example :

breathing difficulty
Heat intolerance
high blood pressure
Diabetes in cats
Liver disease
lameness

So avoid it simply with proper Diet and Healthy snacks in between like slices of raw carrots and green beans as veggies .. or pieces of apples and kiwi or cantaloupes as fruits
 Along with daily Exercise .. prevent obesity don't wait to treat it ;)

السعار في القطط والكلاب

أيه هو السعار و ايه سبب أهميه تحصينات الحيوانات  ضده ؟

السعار هو عباره عن فيروس قاتل بيتنقل من الحيوان المصاب للحيوان السليم وبينتقل كمان للأنسان .. طريقه نقله هي عن طريق اللعاب اللي بيحتوي علي الفيروس ودا بيكون أثناء العض أو عن طريق جرح بيتلوث بلعاب حيوان مسعور فبينقل المرض لداخل الجسم

معظم الأمراض اللي بتيجي للقطط والكلاب بنهتم انه نحصن ضدها عشان نحافظ علي صحه حيواناتنا بس الأهم من التحصينات دي هو تحصين السعار .. السعار مرض ملوش علاج سواء في الحيوانات او الأنسان
والسعار بيتطور بسرعه داخل الجسم وبيسبب الوفاه خلال أيام عشان كده أهم تحصين يحصنه المربي هو تحصين السعار حفاظا علي صحته وصحه عائلته

أيه اللي بيعمله السعار داخل الجسم * في القطط والكلاب * ؟  

 فيروس السعار بيتنشر بسرعه جدا داخل الجسم بيروح اولا للعضلات وثانيا للاعصاب الطرفيه سواء الحسيه اوالحركيه في الجسم ومنها يتنقل للمخ وبالتالي الأعراض هتبقي واضحه في كل مكان الفيروس أتنقل له 

وهو ممكن يتقسم لمرحلتين مرحله بيحصل فيها تغيير في سلوك الحيوان Furious Form of Rabies
ومرحله بيحصل فيها تغييرات في جسم الحيوان وهي ال Paralytic Form of Rabies

والأعراض عامتن هتكون عباره عن :
بتتطور الأعراض بسرعه ويعقبها الوفاه لو كانت العضه قريبه من المخ او النخاع الشوكي وبتبقي عباره عن :
تشنجات  أو شلل للعضلات
عدم التحكم في الفك نتيجه شلل العضلات المتحكمه فيه مع شلل  في الحنجره والبلعوم بيؤدي لنزول اللعاب بشكل غزير وعلي شكل رغوه من فم الحيوان المصاب
وعدم قدرته علي بلع أي شئ مع طبعا عرض مهم جدا ويمكن يكون مشخص لمرض السعار هو عدم قدره الحيوان علي بلع الماء أو ظاهره الخوف من الماء اللي بنسميها 

Hydrophobia
تأثير الفيروس علي باقي عضلات الجسم بيسبب شللها وعدم قدره الحيوان علي الحركه

والتغيير في سلوك الحيوان بيبقي عباره عن  حساسيه شديده ضد الضوء والأصوات العاليه 

 عواء و شراسه غير عاديه بتتميز بيها الحيوانات المسعوره مع محاوله عض أي شئ قدامهم وممكن تتطور انه الحيوان يهجم علي صاحبه أو يحاول يلحس او يعض نفسه في المكان اللي أتعض فيه
أمكانيه أرتفاع درجه حراره جسمه توصل لمرحله الحمي  



*ملحوظه : في حالات نادره بيحصل العكس بيكون الحيوان هادئ جدا بشكل غير اللي متعود عليه صاحبه يعني بيتحول 
الحيوان اللي حركته زياده فجأه لحيوان هادي جدا بشكل غير عادي 

الأعراض في الأنسان :

 
نقدر نقسمها لتغير في السلوك وتغير في صحه الأنسان بمعني انه الأنسان المصاب هيبقي عصبي جدا وحركته زياده ومفاجأه 
مع رفضه لشرب الماء او اي سوائل نتيجه عدم قدرته علي البلع بسبب تأثير الفيروس علي البلعوم والحنجره  
Hydrophobia

مع وجود أعراض مرضيه زي  نوبات من التشنجات تطول وممكن تتوقف وياخد وقت من ارتخاء للعضلات وترجع تاني نوبه التشنجات وكتير بيبقي دا الوقت اللي بيحصل فيه الوفاه بين نوبه التشنجات ووقت ارتخاء العضلات
بنلاقي كمان بيحصل أتساع في حدقه العين مع زياده التبول وأفراز اللعاب من الفم نتيجه تاثير الفيروس علي البلعوم ومنعه منه انه يقدر يبلع اللعاب فبيتراكم في الفم وينزل بشكل غزيرمن الشخص المصاب
أحتماليه موت الأنسان المصاب بالسعار 100%  نتيجه التتابعات اللي هتحصل من شلل لباقي عضلات الجسم خلال 4 ايام لاسبوعين من حدوث الاصابه 

تشخيص المرض في القطط والكلاب : 
فتره حضانه فيروس السعار بيتبقي ما بين اسبوعين ل 8 أسابيع بمعني الفتره بين حدوث الأصابه وظهور الأعراض هي ما بين أسبوعين ل 8 أسابيع 

وبالتالي في حالات التأكد من أن الكلب أو القطه أتعضوا من حيوان تاني حاجتين لازم يحصلوا
لو الحيوان بتاعي متحصن  باخده لليعاده البيطريه و لازم يتحجر لمده 10 أيام عشان أتاكد انه متصابش ودا طبعا عن طريق عدم ظهور أعراض السعار خلال الفتره دي
أما لو الحيوان مش متحصن فبيتعزل لمده 6 شهور في حجر صحي 

للاسف في الحيوانات افضل تشخيص هو عن طريق العزل لمده 10 ايام او 6 شهور حسب التحصينات اللي أخدها الحيوان  والتشخيص التاني بيكون بعد وفاه الحيوان عن طريق الكشف عن الاجسام المناعيه في عينه من  مخ الكلب او القط باختبار ال fluorescence antibody test
أو عن طريق فحص الخلايا والبحث عن أجسام نجري Negri Bodies

ملحوظه : أحيانا امراض كتير بتتميز باصابه الجهاز العصبي وبتعمل أعراض تشبه السعار وبالتالي  لازم أتاكد من وجود عضه وظهور باقي أعراض المرض قبل ما اشخصه وأكد الأصابه بالسعار 

التشخيص في الأنسان :
بيتم قبل حدوث الوفاه * عكس الحيوانات 
عن طريق أخذ عينات من الدم والسائل حوالين الحبل الشوكي وفحصها لتأكيد وجود او عدم وجود أجسام مضاده
أو عن طريق عزل الفيروس من لعاب الشخص المصاب لتأكيد الاصابه

العلاج :
للاسف مفيش علاج لمرض السعار وكل حالات الاصابه بالسعار أنتهت بالوفاه ما عدا حاله واحده لبنت أمريكيه  أسمها جيانا جيس هي تعتبر الحاله الوحيده علي مر  التاريخ اللي نجت من فيروس السعار 

https://www.youtube.com/watch?v=0-GSx1ENgJA

الوقايه :

طبعا عن طريق التحصينات الدوريه ضد السعار اللي بتم خلال أول 3 شهور ل 6 شهور من عمر الجراوي والقطط الصغيره 
وتكرر بعدها اما سنويا او كل 3 سنين حسب قانون الدوله 
سعر أمبول التحصين من 50 ل 70 جنيه ودا يعتبر تمن زهيد عشان أحمي نفسي وأسرتي من مرض ملهوش علاج زي السعار 

أما في حاله أصابه أنسان أتعض أو أتخدش من حيوان في الشارع  ومش متاكد اذ كان حيوان مسعور او لا فالأفضل أنه المكان يتطهر بسرعه ويتغسل بميه وصابون وبعدين يدهن بصبغه يود ويأخد الأنسان المصاب مصل السعار قبل مرور 3 أيام علي العضه 
ولازم يتم تبليغ الجهات البيطريه المعنيه عن وجود حيوان يسبب خطر علي صحه الأفراد عشان يتعزل الحيوان في الحجر الصحي لتأكيد اصابته أو خلوه من الفيروس

أما لو قطتي أو كلبي أتعض سواء من كلب أو قطه شارع أو حيوان متربي في البيت أثناء تشاجر  بس مش  متاكد اذ كان متحصن أو لا فلازم اخده للطبيب البيطري فورا عشان يفحصه  وأتجنب تماما اني المس جلده في مكان العضه علي الاقل لمده ساعتين لان الفيروس ممكن يفضل عايش لمده ساعتين علي جلد الحيوان لو كان الحيوان أتصاب مع تعقيم أرضيه المكان اللي حصل فيه التشاجر لو دا كان داخل البيت بأي ماده مبيضه أو مواد معقمه 


ملحوظه : أثناء التعامل مع قط أو كلب وأنا باديهم أدويه عن طريق الفم الأفضل البس جوانتي طبي عشان أتجنب ان اللعاب بتاعهم يلمس جلدي خاصه لو انا عندي جروح فيها .. ممكن الحيوان ميكونش ظاهر عليه أعراض لسه بس لعابه يكون بيحتوي علي الفيروس ..ودا مهم أكتر لمربي القطط والكلاب والأطباء البيطرين اللي بيضطروا طوال الوقت للتعامل مع الحيوانات 

الوقايه ديما أفضل من العلاج وفي مرض زي السعار الوقايه هي الحل الوحيد :)


المراجع :
http://pets.webmd.com/dogs/rabies-dogs?page=3

http://www.petmd.com/cat/conditions/neurological/c_ct_rabies

http://www.petmd.com/dog/conditions/neurological/c_multi_rabies 
http://www.cdc.gov/rabies/diagnosis/animals-humans.html

عمر النضوج الجنسي في القطط وأفضل وقت للتزاوج و التغذيه المناسبه والأدويه المسوح بها للقطه الحامل

 الوقت اللي بيحصل عنده النضوج الجنسي * اول دوره شبق * في القطط  هو عند عمر ال 5 شهور ل ال10   شهر .. بتوصل القطط السيامي في عمر مبكر للنضوج عن فصايل القطط اللي بتتميز بشعر طويل زي القطط الفارسيه

طيب أيه هي دوره الشبق ومدتها و ايه هي اعراضها ؟

دوره الشبق هو الوقت اللي بيحصل فيه زياده في الرغبه الجنسيه عند الاناث من القطط بعد وصولهم لمرحله النضوج الجنسي 

وبيحصل فيه تغيرات فيسيولوجيه بسبب الهرمونات اللي بيتم افرازها في الفتره دي 

معلومه هامه : لا يتم نزول البويضه الا بعد عمليه التزاوج بين القطط لان فصيله القطط تعتبر
Induced Ovulators
أي يشترط حدوث تزاوج لحدوث عمليه الاباضه

القطط بتيجي في الدوره دي حسب البيئه اللي هي فيها ودرجه الحراره وغالبا هنا في مصر بيتجي في الربيع والخريف بالتالي موسم تزاوج القطط هيكون غالبا في الموسمين دول .. 

طب مده دوره الشبق دي كم يوم ؟
القطط تعتبر seasonal polyestrus animals
بمعني انها بتدخل في دوره الشبق اكتر من مره في الموسم والغالب انها كل أسبوعين ل 3 أسابيع في الموسم بتدخل في دوره شبق ومش ديما اعراض دوره الشبق هتظهر واضحه عليها خاصه في اخر الموسم لان الفترات بين كل دوره والتانيه هتتباعد اكتر
كل دا بيختلف من قط للتاني ومن بيئه ودرجه حراره لمكان ودرجه حراره تانيه وطبعا بتتوقف الدورات لما بيحصل التزاوج

نقدر نقسم الدوره دي  ل 3 مراحل :
المرحله الأولي بتبقي  اول يوم او  يومين و بيحصل فيها تورم في الفتحه التناسليه عند القطه وبتبقي مبلله بالأفرازات المهبليه .. ممكن تلاحظ ان القطه بتتبول في أماكن معينه حوالين البيت عشان تنزل الفرمونات اللي هتشمها القطط الذكور وتتعرف علي انه في المكان دا في قطه جاهزه للتزاوج وفي الفتره دي مش هيحصل تزاوج هي فتره بنسميها فقط بفتره الغزل .. يعني فتره مؤهله لعمليه التزاوج وبالتالي لو أنا مش حابب ان قطتي تحمل يبقي في الوقت دا هامنعها من الاختلاط بالقطط الذكور تماما

المرحله التانيه هي بعد مرور يومين  من بدايه الدخول في دوره الشبق و هتظهر أعراض واضحه علي القطه * او بنسميها فتره
الاحترار اوفتره * قبول التزاوج  وهتستمر الأعراض دي من 4 ل 6 أيام

لو انا مربي للقطط وباهتم اني احصل علي  خلفه  صحتها كويسه : يبقي ممكن اتاكد قبل ما القطه تيجي في موسم التزاوج من انها واخده تحصينتها كويس وواخده ادويه ضد الديدان والحشرات والجرب * عشان الولده تتولد صحتها كويسه *

لقراءه جدول التطعيمات الخاص بالقطط وأفضل أدويه للوقايه من الديدان الرجاء الضغط علي الرابط التالي :
http://online-vetclinic.blogspot.com.eg/2015/08/blog-post_27.html

http://online-vetclinic.blogspot.com.eg/2015/08/blog-post_72.html

الأعراض اللي هتظهر علي القطه في وقت قبول  التزاوج *  :
تغيير في سلوك القطه وزياده المواء لمرحله بيحس فيها صاحب القطه كانها بتبكي من ألم معين ولكن المواء بيكون عباره عن نداء القطه للذكور بيبدأ في الأول علي فترات متقطعه وفي الأخر بيبقي تقريبا متواصل مع دحرجه القطه علي الأرض وفرك جسمها سواء في الأرض أو أثاث المنزل أو حتي رجل صاحبها

بعض المربيين بيلجأوا لحيله عشان يتأكدوا ان القطه في موسم التزاوج وهو  ضرب القطه ضربه خفيفه علي المؤخره وبتتفاعل القطه مع الضربه دي بأنها بتقعد علي بطنها وترفع منطقه الحوض وتحرك ذيلها علي اي جنب أستعداد للتزاوج زي الموضح في الصوره 

لو أنا مهتم أن القطه تحمل يبقي قبل الفتره دي هاكون لاقيت قط ذكر واخد التحصينات وصحته كويسه أخد قطتي عنده ومش العكس , يعني القطه هي اللي بتروح لمكان الذكر وأسيبها هناك طول فتره الدوره عشان أتاكد انه حصل أخصاب

لو حصل تزاوج بين القطه مع ذكر في الوقت دا بيحصل أثاره للمبيض ونزول البويضه بعد 24 ساعه ل 30 ساعه من عمليه التزاوج ولو حصل أخصاب للبويضه بتخرج للرحم وبتبدأ تلتصق بيه وتبدأ في تكوين الأجنه وغالبا هتبقي الفتره من وقت الأخصاب لوقت الولاده في متوسط ال 63 يوم

المرحله التالته : وهي مرحله بترفض فيها القطه عمليه التزاوج وفيها 3 أحتمالات
الأحتمال الأول : لو حصل تزاوج ونتج عنه أخصاب فبيتهيأ الرحم للحمل وتظهر أعراضه علي القطه بعدين
 الأحتمال التاني : لو محصلش تزاوج لقطه مع ذكر في وقت التزاوج او فتره الاحترار هتدخل القطه في دوره شبق من اول وجديد بعد أسبوع لأسبوعين من نهايه وقت التزاوج والقبول
الأحتمال التالت لو حصل تزاوج ولكن لم يحدث أخصاب لاي سبب فبتدخل القطه في مرحله تشبه الحمل الكاذب وتنتهي بعدها ب 36 يوم

طيب أعراض الحمل وتشخيصه ايه :

فتره الحمل في القطط ممكن تتراوح ما بين ال 65 ل 69 يوم
أول تغيير بيظهر هو في سلوك القطه اللي بتميل للهدوء وقله الحركه 

زياده وزن القطه في الأسابيع الأخيره من الحمل بشكل ملحوظ  وبتختلف الزياده حسب عدد الاجنه  * يعني مش اول ما يحصل الحمل القطه وزنها هيزيد *

خاصه وان في اول الحمل بيبقي في غثيان وممكن القطه متاكلش كويس بالشكل المتوقع 

لكن بعد الشهر الاول من الحمل هتزيد شهيه القطه وهنا لازم اهتم جدا بالتغذيه

* ملحوظه : لو لاقيت القطه بتحاول تاكل برازها او تاكل اي حاجه غريبه غير اكلها لازم اخدها للطبيب البيطري لانه غالبا هيكون عندها نقص في المعادن والفيتامينات اللي بتحتاجها لجسمها ولتكمله الحمل فبالتالي بتعوضه من أكل اي حاجه حواليها

بروز حلمات الثدي نتيجه امتلاء الغدد اللبنيه ودا بيكون واضح في المرحله الاخيره من الحمل وغالبا كبر حجم الرحم هيضغط علي البطن وهيبقي صعب علي القطه انها تتبول  وتتبرز في الليتر بوكس بتاعها كالعاده وطبعا لازم علي المربي انه يراعي دا  وميعقبهاش بل بالعكس المفروض انه يساعدها وينضف لها مكان الاخراج بقطن مبلل ويحاول يستحمل التغيير اللي بيحصل في سلوكها لحد ما تولد 

عند الأسبوع السابع في اغلب الاحيان هتكون القطه بتدور علي مكان مناسب عشان تولد فيه وخاصه الدواليب بتبقي اكتر الاماكن اللي القطط بتحاول تولد فيها عشان بتبقي ضالمه وبعيده عن اي حد فالافضل في الوقت دا وقبله بشويه تحاول تعود القطه علي المكان اللي انت شايفه مناسب لولادتها وتخلي المكان دا هادي وبعيد عن اي حركه عشان القطه تتطمن له وتفرشه بفوط جافه وناعمه عشان تبقي القطه مرتاحه فيه وهي بتولد
* قبل عمليه الولاده بيوم بتبدأ القطه في لحس بطنها ومهبلها بزياده وهنا لازم أنتبه لها لانها في اي وقت ممكن تولد ولازم ابقي عامل حسابي لو حصل أي تعقيدات وقت الولاده اني أستشير طبيب بيطري بسرعه

التشخيص :
طبعا الأعراض هتكون مساعده في تشخيص الحمل بس بجانب دا ممكن يجس الطبيب البيطري بطن القطه الحامل ودي محتاجه خبره ومش ديما بتكون صح خاصه وان الجس صعب يأكد عدد الأجنه واذ كانت صحتهم كويسه ولا لا وبالتالي ممكن يتعمل تحليل حمل للريلاكسين هرمون عند اليوم ال 20 لل 25 من الحمل حسب توافره في العياده البيطريه او بيفضل السونار والأكس راي

 السونار بيتعمل عند الاسبوع التالت في معظم العيادات البيطريه دلوقت و بيظهر وقتها نبض الجنين او علي الاغلب عند اليوم 22 ل 25 من الحمل بيبدأ  ظهور نبض قلب الأجنه علي السونار

وعند الاسبوع السادس من الحمل الاكس راي ممكن تظهر عظام الاجنه وبالتالي اقدر اعرف عددهم لان دا الوقت اللي بيحصل فيه تكلس  للهيكل العظمي بتاع الاجنه  فيظهر واضح في الاشعه 

التغذيه السليمه للقطه الحامل :

قبل ما نتكلم بأستفاضه عن التغذيه احب اذكركم تاني انه لازم القطه تكون مطعمه وواخده ادويه ضد الحشرات والديدان قبل ما تتزاوج عشان القطط  تنزل سليمه وصحه القطه تفضل كويسه بعد الولاده

التغذيه السليمه هتكون عباره عن زياده كميه ونوعيه الاكل خاصه في النص التاني من الحمل

يعني كميه الاكل تزيد مره ونص عن الطبيعي والافضل اني ازود عدد الوجبات خلال اليوم لان كبر حجم الرحم هيضغط علي المعده وهيخلي القطه تشبع بسرعه
والنوعيه هنختصرها في دراي فود يكون مخصص للقطه الحامل زي 

Royal Canin MOTHER & BABY CAT

http://www.royalcanin.com/products/products/cat-products/feline-health-nutrition/mother-babycat

او اي دراي فود من ماركه تاني مخصص للحمل ولو باستعمل دراي فود عادي ممكن اشتري النوع المخصص للقطط الصغيره  واديه لها لانه بيكون مركز في الفيتامينات والمعادن * والافضل طبعا الرويال لانه فيه كل احتياجات القطه الحامل *

لو باكل فريش يبقي هاهتم بالبروتين والكالسيوم والخضروات عشان المعادن والفيتامينات وابعد عن الاكل المسبك واللي فيه توم وبصل واملاح وتوابل 

مع اني ديما أوفر لها ماء تشربها علي مدار اليوم

ولقراءه موضوع تاثير التوم والبصل علي صحه القطط الرجاء الضغط علي الرابط التالي :

http://online-vetclinic.blogspot.com.eg/2015/09/blog-post_50.html

الادويه المسموح بها والممنوعه وقت الحمل :

المسموح بيه :
يفضل أخد حمض الفوليك يوميا خلال فتره الحمل لمنع تشوهات الاجنه 
      ويفضل اخد كورس كالسيوم خاصه في النص التاني من الحمل * وقت تكلس الهيكل العظمي للاجنه *

ممكن يوصف الطبيب البيطري مالتي فيتامين عشان ميحصلش نقص في الحديد ولا باقي المعادن والفيتامينات المهمه لصحه القطه الحامل

الممنوع :

ممنوع تحصين القطط  أثناء الحمل

ممنوع أعطاء ادويه لمعالجه الاصابه بالديدان  اثناء الحمل

* ممنوعه كل أمبولات مقاومه الحشرات زي البراغيت والقراد * ما عدا الفرونتلاين قطط أمن جدا لانه عشبي *

*طبعا  الايبوبروفين و الباراسيتمول كمسكن وخافض للحراره ومضاد للالتهابات ممنوع في العموم للقطط  

المضادات الحيويه اللي بتحتوي علي تتراسيكلين زي اوكسيتتراسيكلين والدوكسيكلين والتيراميسين ومضادات الفطريات اللي بتحتوي علي جريسوفلفين ممنوعه 

لقراءه موضوع التسمم بالبارسيتمول في الكلاب والقطط اضغط الرابط التالي :

http://online-vetclinic.blogspot.com.eg/2015/09/blog-post_6.html

المراجع اللي أتكتب منها المقال :

http://pets.webmd.com/cats/heat-estrus-cycle-cats?page=2

http://www.petmd.com/cat/care/evr_ct_pregnant_cat

http://www.pet-informed-veterinary-advice-online.com/cat-pregnancy.html

http://www.petplace.com/article/drug-library/library/prescription/oxytetracycline-terramycin-
liquamycin

http://www.frontlineplus.co.nz/products/Frontline-Plus/Pages/FRONTLINE-Plus-FAQs.aspx

http://ourpetclub.com/vb/t95107.html

Feline Infectious Pertonitis or FIP in cats

it is a viral disease caused by a mutant form of corona virus ,, cause 95% mortality rate in affected cases 
can affect wild and domestic cats too , especially cats within 3 months to 3 years of age 

Symptoms :
there are two forms of the virus 
a) Dry form or non-effusive form
b) Wet form or effusive form

Dry form Signs :
non-responsive Fever
loss or lack of appetite
jaundice
lesions in the eye layers 

Wet form or effusive form :
non-responsive Fever
loss or lack of appetite
also characterized by :
accumulation of fluid in the body cavities like abdomen and chest
accumulation of fluids in abdominal cavity cause potbellied abdomen with non painful palpation , 
while it cause labored breathing when it accumulates in the chest cavity with sneezing and runny nose 

Diagnosis :
Diagnosing FIP is challenging. there is currently no test that can distinguish between the harmless intestinal coronavirus and the deadly FIP coronavirus. A positive coronavirus antibody test may support the veterinarian’s suspicions, but by itself is inconclusive. 
There are other tests that can help support a diagnosis of FIP, such as ultrasound or body fluid analysis, but no test is definitive.
Your pet’s veterinarian may take sample of fluid from abdominal or thoracic cavity for further evaluation.

How is FIP treated?

There is no effective treatment for FIP, which is fatal in more than 95 percent of cases. In mild cases of the dry form, it may be possible to prolong the survival period, but most cats with the wet form of the disease die within two months of the onset of signs. 

Preventing the disease :
The only way to protect your cat from this aggressive disease is to practice routine disinfection of your cat's living areas, food/water utensils, and cages.
It is essential to isolate new litters of kittens from other cats (not their mother) to prevent contact with this disease. 
If the mother is found to be infected, taking the kittens away will not improve their chances, since by that time they have already been exposed to the virus. Indeed, the antibodies in her milk may protect them from infection while they are still small.

References :
http://www.petmd.com/cat/conditions/infectious-parasitic/c_ct_feline_infectious_peritonitis?%24Version=0&%24Path=%2F&%24Domain=.petmd.com%2C%20%24Version%3D0

https://www.aspca.org/pet-care/cat-care/feline-infectious-peritonitis

مرض الكورونا الفيروسي في القطط

مرض الكورونا المتحور او المتعارف عليه ب أف أي بي 

  Feline Infectous Pertonitis or FIP 

 هو مرض يسببه فيروس الكورونا المتحور , بيصيب القطط البريه والأليفه نسبه الشفاء منه اقل من 5 % نتيجه وجود الحمي والاعراض الاخري للمرض  واحتماليه حدوثه في القطط من عمر ال 3 شهور ل 3 سنين وارده 

المرض بينتقل للقطط السليمه بسرعه وبالتالي في حاله تاكيد الأصابه بالفيروس الافضل عزل باقي القطط عن مكان الاصابه ومنع القطط الصغيره من الاختلاط بالقطط اللي مناعتها ضعيفه
 

أعراضه :
منه نوعين DRy and Wet Form
بيشتركوا في نفس الاعراض وهي حمي مش بتستجيب ابدا للمضادات الحيويه مع فقدان للشهيه ونقص في الوزن وصعوبه في الحركه 

wet form
بيزيد بعرض عن النوع التاني وهو تجمع السوائل في البطن او الصدر او الاتنين    

لو اتجمعت السوائل في البطن فبيظهر حجمه كبير مع عدم وجود الم اثناء جسه لو اتجمعت في الصدر فبتضغط علي الرئتين وتسبب صعوبه في التنفس مع عطس وزياده الافرازات من الأنف 
الحاله المصابه بالنوع دا بتتطور بسرعه وبيصعب علاجها

 

DRy form 
  بتتميز ب بالحمي و والأنيميا واحيانا تتطور الحاله وتصاب بالصفراء  
مع التهاب لطبقات من العين 

تشخيص المرض :
بعد ظهور الأعراض بيصعب التأكيد من تشخيص المرض بأختبارات المعمل لان فيروس الكورونا الاصلي اللي بيصيب الامعاء هو اللي ممكن يظهر في التحليل ودا مش هيبقي دليل علي ال أف أي بي 
لكن بيتعمل التحليل elisa عامتن للتاكيد انه فيه فيروس كوروونا 
وباقي التشخيص بيكمل من الاعراض او اخذ عينه من سوائل البطن وفحصها لتاكيد وجود الفيروس
مع تحليلات الدم اللي بتظهر نقص في عدد الخلايا المناعيه بسبب الاصابه

علاج المرض :
في حاله ال dry form
يمكن اعطاء علاج لكل عرض * لايوجد علاج فعال ومخصص للمرض *


في حاله ال wet form
غالبا معظم الحالات المصابه مش هتستجيب لاي دواء والمرض هينتشر بسرعه ويصاحبه الوفاه بعد كده للاسف 


المراجع :
http://www.petmd.com/cat/conditions/infectious-parasitic/c_ct_feline_infectious_peritonitis?%24Version=0&%24Path=%2F&%24Domain=.petmd.com%2C%20%24Version%3D0

https://www.aspca.org/pet-care/cat-care/feline-infectious-peritonitis