مرض البارفو المسبب لأعلي نسبه وفيات في الكلاب : أعراضه والوقايه منه

تعريف البارفو وطريقه نقل العدوي بين الكلاب :

  البارفو عباره عن مرض فيروسي لا يوجد له علاج مخصص  حتي الأن .. ويسبب نسبه وفيات كبيره بين الكلاب وخاصه في الجراوي أقل من عمر ال 3 شهور وفي بعض الفصائل  اللي بتعتبر أكتر حساسيه للأصابه بالمرض عن غيرها زي الروت والدوبرمان و اللبرادور .

بيصيب الكلاب بنوعين أما أصابه للامعاء ويصاحبها أسهال مدم وترجيع وفقد للشهيه ونقص في الوزن  أو أصابه في عضله القلب ودا بيجي اكتر في الجراوي وبينتهي بالوفاه .

بينتقل البارفو بين الكلاب بسهوله نتيجه وجود براز الكلب المريض في المكان او نتيجه وجود المواد اللي خرجت أثناء الترجيع في المكان اللي فيه باقي الكلاب حتي لو تم تطهير المكان بالمنظفات المنزليه العاديه بيفضل فيروس البارفو في المكان مقاوم لمده ممكن توصل لسنتين عشان كده بيعتبر البارفو من أخطر الفيروسات اللي بتصيب 

الكلاب 

فتره حضانه الفيروس :
الفتره من الاصابه بالفيروس لظهور الاعراض بيتبقي من اسبوع ل 14 يوم وممكن تظهر الاعراض بشكل حاد بعد يومين من الأصابه في حالات الجراوي تحت سن ال 3 شهور 
أما في حالات الكلاب الكبيره ممكن يظهر المرض بعرض أو اتنين ووممكن تحصل الأصابه ومناعه الكلب تقاومها بدون ظهور أعراض مميزه للمرض * نتيجه المناعه النشطه عند الكلاب الكبيره *  وغالبا بيسهل علاج الكلاب الكبيره وبتبقي نسبه الوفيات  نادره 

 أعراضه :

 * الاصابه اللي بتستهدف الأمعاء بيظهر عنها أعراض في الغالب حمي وفقدان للشهيه وحدوث جفاف للحيوان نتيجه تأثير الفيروس علي قدره المعده في أمتصاص المواد الغذائيه والماء .. وألم في منطقه البطن عند فحصها و طبعا  أسهال رائحته كريهه زي البيض الفاسد وبيكون  مدم نتيجه ألتهاب الامعاء مع ترجيع ونتيجه نزول الدم في البراز فبيظهر لونه محمر 

 * الأصابه التي بتستهدف عضله القلب وتسبب الوفاه دي أقل في حدوثها من أصابه الأمعاء وبيصاحبها في الغالب نقص في درجه حراره الكلب وليس حمي

التشخيص :

عن طريق الأعراض وعن طريق فحص الطبيب البيطري للكلب وأخذ عينه من برازه وتحليلها بأختبار البارفو اللي بقي موجود حاليا   في معظم العيادات البيطريه وبقي في المتناول ..
ممكن يتعمل فحص لصوره دم عشان يبان عدد خلايا الدم البيضاء* الخلايا المناعيه * اللي بتقل وقت الاصابه بمعدل كبير
غير تحليلات تانيه كيميائيه ممكن يطلبها الطبيب المعالج عشان يقدر يشخص لاي مرحله وصلت الأصابه 

ملحوظه : مش كل اسهال مدم بيبقي اصابه بالبارفو ومش كل قئ مع أسهال وفقد للشهيه يعتبر مشخص لمرض البارفو
الافضل في حاله شك ان الكب مصاب اخد عينه من برازه وتحليله في العياده البيطريه  

الوقايه من البارفو :
أولا :  بما أنه مرض بيجي  أكتر للجراوي قبل عمر ال 3 شهور .. فالأفضل تطعيمهم عند عمر ال 6 أسابيع وبعدين تكرار التطعيم مرتين كمان بفارق 3 اسابيع بين كل جرعه لضمان وقايه الجرو من البارفو 
ومنع الجراوي اللي لسه واخده التحصين من الاختلاط بالكلاب الاخري علي الاقل لمده اسبوعين بعد اخر جرعه من التحصين 
* لان مناعه الجرو هتكون لسه ضعيفه وهيسهل انتقال الفيروس ليه *

الرجاء مراجعه جدول تطعيمات الكلاب بالمدونه :
http://online-vetclinic.blogspot.com.eg/2015/08/blog-post_29.html

ثانيا : تعقيم أماكن وجود الكلاب بشكل دوري وخاصه لو حصلت اصابه  .. تعقيم كل شئ في مكان  وجود الكلب المصاب ومنع أختلاطه مع الكلاب الاخري حتي بعد معالجته علي الاقل لمده شهرين 
مش معني انه كلب اتعالج من البارفو انه ممكن المرض ميصبهوش تاني .. مجرد ما مناعه الكلب تقل نتيجه وجود امراض مزمنه او أورام وسرطانات  بيسهل أنه يتصاب بالمرض تاني  فالوقايه هتكون أفضل خاصه وان علاج البارفو صعب وفي حالات بيكون غير مجدي

ثالثا : فصيله الكلاب  الروت والدوبرمان واللبرادور الافضل انها تطعم في أول سنه من العمر بالتحصين ضد البارفو اربع  جرعات مش تلاته لانها اكتر عرضه للاصابه من الفصائل التانيه 

* من ست أسابيع لحد ما توصل أربع شهور بفارق 3 اسابيع بين كل جرعه والتانيه *

 رابعا : الأفضل تطعيم الكلبه قبل أجراء عمليه التزاوج بفتره  لضمان سلامتها وسلامه الجراوي
 

 خامسا : غسل الايدين كويس جدا بعد ملامسه براز الكلاب عشان امنع اصابه الكلاب الاخري لو كان الكلب مريض ولسه مظهرش عليه  الاعراض

سادسا : في حاله الطوارئ لدواعي السفر وغيره  وترك الكلب لمده كم يوم في استضافه عياده , الافضل اني اطلب انه يكون في مكان معزول عن باقي الكلاب في العياده وأتاكد من ان العياده بتعقم اقفاص الكلاب بشكل دوري عشان اتجنب اني ارجع من السفر والاقي كلبي مصاب 


علاج البارفو :

عشان الموضوع يبقي واضح حالات كتير من البارفو في الجراوي بتنتهي بوفاه الجرو .. بس في حالات تانيه ودي قليله بتقدر تتغلب علي المرض
بروتوكول العلاج هيكون عباره عن علاج لكل عرض  Symptomatic treatment
 بمعني انه مفيش لحد دلوقت دواء مخصص لمعالجه المر ض بس العلاج بيكون حسب ظهور العرض  
 يعني  محاليل في الوريد لمعالجه الجفاف اللي هيسببه المرض مع أدويه لمنع الاصابه البكتيريه 
وطبعا أدويه ترفع المناعه زي الايميولانت وفيتامين سي 

 فيتامين ك عشان النزيف وأدويه لمعالجه الأسهال 

وحقن لوقف الترجيع وغيره .. الطبيب البيطري وحده هو اللي هيقدر يقرر اي نظام للعلاج أفضل في حاله الكلب 

سؤال معظم مربي الكلاب بيسألوه : ليه الكلب بيتصاب بالبارفو رغم انه متحصن باكتر من جرعه من التحصين ؟
أحيانا بيفشل جسم الكلب في تكوين اجسام مضاده ضد المرض خاصه مع التحور الجيني اللي بيحصل لسلالات الفيروسات 
وبالتالي ممكن اطعم بسلاله البارفو المتعارف عليها وتظهر سلاله متحوره يكون الجسم مش مكون اجسام مضاده ضدها فتسبب المرض

في الجراوي اللي لسه مولوده احيانا بيكون لبن السرسورب بتاع الام  فيه نسبه اجسام مضاده عاليه لما الجرو بيشرب من اللبن بتتنقل له فبيقاوم التحصين 
وبالتالي أفضل وقت للتحصين هو عند عمر ال 6 اسابيع ل 8 اسابيع 

التطعيم بجرعه واحده من التحصين بتكون غير كافيه لتكوين الاجسام المضاده للفيروس وبالتالي هيسهل علي الفيروس انه يقتحم جسم الحيوان ويسبب المرض 

أتمني الموضوع يكون أفادكم لأي أستفسارات الرجاء التواصل معنا علي صفحتنا علي 
الفيسبوك او صفحتنا بالمدونه  :)

المراجع اللي أتكتب منها المقال :

http://www.peteducation.com/article.cfm?c=2+2102&aid=467

http://www.petmd.com/dog/conditions/infectious-parasitic/c_dg_canine_parvovirus_infection?page=2