فتره الحمل في الكلاب وأفضل وقت للتزاوج و التغذيه المناسبه للكلبه الحامل والادويه المسموح بها

الوقت  اللي بيحصل عنده النضوج الجنسي * اول دوره شبق * في الكلاب هو عند عمر ال 6 شهور ل ال12  شهر .. بيوصل الحيوانات اللي من الفصايل اللي جسمها صغير في وقت مبكر  للنضوج الجنسي عن فصايل الحيوانات الكبيره في الحجم

طيب أيه هي دوره الشبق ومدتها و ايه هي اعراضها ؟
دوره الشبق هو الوقت اللي بيحصل فيه زياده في الرغبه الجنسيه عند الاناث من الكلاب بعد وصولهم لمرحله النضوج الجنسي 
وبيحصل فيه تغيرات فيسيولوجيه بسبب الهرمونات اللي بيتم افرازها في الفتره دي مع تكوين للبويضه في المبيض 
لو حصل تزاوج في الوقت دا  ممكن الكلبه تحمل  .. بس طبعا يفضل انه يحصل التزاوج بعد تالت دوره شبق  او بين عمر ال سنه ونص لسنتين عشان البويضات تبقي ناضجه كفايه و تبقي صالحه للتخصيب
  
الكلاب بتيجي في الدوره دي تقريبا  مرتين في السنه وبالتالي موسم تزاوج الكلاب هيكون مرتين في السنه .. او كل 4 ل 6 شهور  ودا الشائع واحيانا بعض الكلاب الكبيره   الحجم بيبقي الفتره بين كل دوره والتانيه ممكن توصل ل 11 شهر * الاختلاف موجود من كلب للتاني ومن فصيله لتانيه *
 

طب مده دوره الشبق دي كم يوم ؟ 
بتكون بين اسبوعين ل 3 أسابيع بتختلف من كلب للتاني وغالبا بتبقي الفترات بين دورات الشبق في اول سنتين من عمر الكلبه غير منتظمه 


الأعراض اللي هتظهر علي الكلبه في موسم التزاوج * او في وقت دوره الشبق *
مجرد ظهور الأعراض دي لو انا حابب اجوز الكلبه بتاعتي هابتدي اهتم باني اشوف ذكر من نفس نوعها متحصن وخالي من الامراض عشان اجوزه لها ولو انا مش حابب انها تتجوز يبقي طول فتره دوره الشبق بتاعتها هامنعها من نزول الشارع او الاختلاط بكلاب ذكور تانيه 

لو انا مربي للكلاب وباهتم اني احصل علي جراوي صحتها كويسه : يبقي ممكن اتاكد قبل ما الكلبه تيجي في موسم التزاوج من انها واخده تحصينتها كويس وواخده ادويه ضد الديدان والحشرات والجرب * عشان الجراوي تتولد صحتها كويسه *

الاعراض اللي هتظهر علي الكلبه :

أنتفاخ الفتحه التناسليه للكلبه * في بعض الكلاب الانتفاخ ممكن ميكونش واضح اوي *
نزول أفرازات دمويه من الفتحه الخارجيه في أول أيام من الدوره بتتغير في لونها وكثافتها علي طول الدوره من لون دموي وكثيف لسائل خفيف ولونه وردي لسائل اصفر  .. أنتهاء نزول الدم مش علامه علي أنتهاء الدوره بالعكس أحيانا لما بيقل ويختلف شكل الدم  لسائل خفيف بتكون دي افضل  علامه علي التبويض
تغيير في سلوك الكلبه * عصبيه وتصرفاتها غريبه عن الطبيعي *
زياده معدل التبول عند الكلبه  مع افراز الفرمونات * المواد اللي بتفرز ويشمها الكلاب الذكور عشان يعرفوا ان الكلبه دي جاهزه للتزاوج *  وبيحصل بعدها لو شم كلب الفرمون دا انه بيتبول في المكان حوالين الكلبه عشان يظهر ان دا بقي مكانه وميسمحش لاي كلب تاني انه يقرب للكلبه في وقت التزاوج بتاعها 

رفع الكلبه لديلها علي جانب جسمها دي علامه علي انها جاهزه للتزاوج
وتسمي الظاهره دي بال Flagging 


بعض المربيين بيكون موضوع تزاوج الكلاب عندهم هام جدا ومش بيقدروا يعتمدوا علي الاعراض لوحدها ف بيلجأوا لطبيب بيطري عند اليوم الخامس والسابع والتاسع من نزول الدم عشان ياخد عينه من المهبل ويفحص  هل الكلبه في وقت التبويض ولا لسه 
او عند اليوم ال 9 او ال 11 بياخدوا عينه من الدم عشان يقيسوا هرمون البروجسترون عشان يتاكدوا من افضل وقت للتلقيح سواء تلقيح طبيعي أو صناعي زي اللي معظم المربيين بيلجأوا ليه مؤخرا 

وأحيانا بينصح الطبيب البيطري بتلقيح الكلبه 3 مرات عند اليوم التاسع وال 11 واليوم ال  13 للتاكد من تمام عمليه الاخصاب


فتره الحمل من وقت التبويض لوقت ولاده الجراوي بتكون  ما بين 59 يوم ل 65 يوم بس مش شرط يكون وقت الأخصاب هو الوقت اللي حصل فيه التزاوج  لان الحيوانات المنويه بتكون صالحه لمده خمس ايام لاسبوع خلالهم لما بيحصل تبويض بيحصل الاخصاب
وبالتالي ممكن تختلف فتره الحمل من وقت التزاوج للولاده ما بين 56 يوم ل 72 يوم

طيب أعراض الحمل وتشخيصه ايه :

  الأعراض بتبقي عباره عن نزول افرازات من المهبل بعد مرور شهر من التزاوج *مش عرض واضح*
زياده وزن الكلبه ل 25 % من وزنها الاساسي عند بدايه  الاسبوع الخامس او اكتر حسب عدد الاجنه  * يعني مش اول ما يحصل الحمل الكلبه وزنها هيزيد *
خاصه وان في اول الحمل بيبقي في غثيان وممكن الكلبه متاكلش كويس
لكن بعد الشهر الاول من الحمل هتزيد شهيه الكلبه وهنا لازم اهتم جدا بالتغذيه 
بروز حلمات الثدي نتيجه امتلاء الغدد اللبنيه ودا بيكون واضح عند عمر تكوين عضم الاجنه وهو ال 40 يوم او الاسبوع السادس 

التشخيص :

في اول 3 اسابيع من الحمل التغيرات بتكون بسيطه وبيكون صعب جس الاجنه  بس ممكن يتعمل تحليل دم وبول والافضل 
السونار اللي ممكن يظهر الاجنه عند 25 يوم 

وعند الاسبوع السادس من الحمل الاكس راي ممكن تظهر عظام الاجنه وبالتالي اقدر اعرف عدداهم لان دا الوقت اللي بيحصل فيه تكلس  للهيكل العظمي بتاع الاجنه  فيظهر واضح في الاشعه 


التغذيه السليمه للكلبه الحامل :
قبل ما نتكلم بأستفاضه عن التغذيه احب اذكركم تاني انه لازم الكلبه تكون مطعمه وواخده ادويه ضد الحشرات والديدان قبل ما تتزاوج عشان الجراوي تنزل سليمه وصحه الكلبه تفضل كويسه بعد الولاده * خاصه الوقايه من الجرب اللي بينتقل من الام للجراوي *

التغذيه السليمه هتكون عباره عن زياده كميه ونوعيه الاكل خاصه في النص التاني من الحمل
يعني كميه الاكل تزيد مره ونص عن الطبيعي والافضل اني ازود عدد الوجبات خلال اليوم لان كبر حجم الرحم هيضغط علي المعده وهيخلي الكلبه تشبع بسرعه فالافضل اقسم الوجبه الاساسيه لعدد اكبر من الوجبات الصغيره خلال اليوم
والنوعيه هنختصرها في دراي فود يكون مخصص للكلبه الحامل زي 
ROYAL CANIN STARTER

او اي دراي فود من ماركه تاني مخصص للحمل ولو باستعمل دراي فود عادي ممكن اشتري النوع المخصص للجراوي واديه لها لانه بيكون مركز في الفيتامينات والمعادن * والافضل طبعا الرويال لانه فيه كل احتياجات الكلبه الحامل *
لو باكل فريش يبقي هاهتم بالبروتين والكالسيوم والخضروات عشان المعادن والفيتامينات وابعد عن الاكل المسبك واللي فيه توم وبصل واملاح وتوابل 


 لقراءه موضوع الفاكهه  المفيده للكلاب الرجاء الضغط علي الرابط التالي :
http://online-vetclinic.blogspot.com.eg/2015/09/blog-post_3.html

ولقراءه موضوع تاثير التوم والبصل علي صحه الكلاب الرجاء الضغط علي الرابط التالي :
http://online-vetclinic.blogspot.com.eg/2015/09/blog-post_50.html

*ملحوظه :
التمشيه مفيده جدا في الوقت .. مره في اليوم علي الاقل بس من غير ما اعرض الكلبه لاي اجهاد 

الادويه المسموح بها والممنوعه وقت الحمل :
المسموح بيه :
يفضل أخد حمض الفوليك يوميا خلال فتره الحمل لمنع تشوهات الاجنه 
ويفضل اخد كورس كالسيوم خاصه في النص التاني من الحمل * وقت تكلس الهيكل العظمي للاجنه *
ممكن يوصف الطبيب البيطري مالتي فيتامين عشان ميحصلش نقص في الحديد ولا باقي المعادن والفيتامينات المهمه لصحه الكلبه الحامل

الممنوع :
ممنوع تحصين الكلاب أثناء الحمل
ممنوع أعطاء ادويه لمعالجه الاصابه بالديدان  اثناء الحمل * ما عدا الفينبندازول أمن  هو والبرازيكونتل  والبيرنتال بوميت*
* ممنوعه كل أمبولات مقاومه الحشرات * ما عدا الفرونتلاين أمن جدا لانه عشبي *
*طبعا  الايبوبروفين و الباراسيتمول كمسكن وخافض للحراره ومضاد للالتهابات ممنوع في العموم للكلاب 
المضادات الحيويه اللي بتحتوي علي تتراسيكلين ومضادات الفطريات اللي بتحتوي علي جريسوفلفين ممنوعه 
لانها ممكن تمنع نمو الاجنه بشكل طبيعي

لقراءه موضوع التسمم بالبارسيتمول في الكلاب والقطط اضغط الرابط التالي :
http://online-vetclinic.blogspot.com.eg/2015/09/blog-post_6.html



المراجع اللي أتكتب منها المقال :
http://www.vcahospitals.com/main/pet-health-information/article/animal-health/estrus-cycles-in-dogs/5778

https://www.aspca.org/pet-care/dog-care/estrus-or-heat

http://www.medicanimal.com/A-complete-guide-to-caring-for-a-pregnant-bitch/a/ART111507

http://www.dogbreedinfo.com/breedingheat.htm