التخلص من القراد والبراغيت نهائيا في الكلاب

مشكله القراد والبراغيت  مشكله بتأرق مربي الكلاب .. خاصه لو الكلب كل ما يخرج بره البيت او يخرج في مكان فيه زرع يرجع عليه قراده او اتنين وبراغيت 

بس دي تعتبر مش مشكله لان قراده او اتنين او عشره حتي سهل أنه نشيلها من غير ما نقلق من انها تمص دم الكلب وتسبب له  الحساسيه والهرش بس حاله زي اللي في الصور دي حاجه تقلق خاصه لو عرفنا انه كل برغوته بتمص من دم الحيوان بمعدل 10   مرات  وزنها يعني كميه كبيره من القراد والبراغيت علي جلد الكلب كفيله أنها تسبب له أنيميا وفقد لكرات الدم الحمراء
وبالتالي هزل ونقص في وزن الكلب وفي حالات نادره أتسبب القراد في وفاه الكلاب 

أتصرف أزاي لو لاقيت كلبي عليه قراد وبراغيت بس بكميه قليله 

:

أسهل حاجه اني اجيب برطمان بلاسيتك وأملاه ماء وصابون مواعين او ديتول  وألبس الجوانتي الطبي عشان ما يبقاش فيه أحتكاك بيني وبين الحشره* القراد والبراغيت بينقلوا أمراض كتير ممكن تتنقل لينا فالوقايه ضروريه جدا * 
بملقاط أمسك القراده بشكل عمودي وألفها عشان أخرج الممص بتاعها من تحت الجلد وأمسك الحشره وأحطها في الماء والصابون 
وبعدين أرمي كل الحشرات في التواليت بعد ما أتاكد أنها ماتت 
الوقايه بعد كده ضروريه جدا والوقايه هتبقي علي هيئه شاور للكلب ممكن نستخدمه مره شهريا ويكون بيمنع البراغيت والقراد من وضع بويضاته علي جلد الكلب * في شامبو ولوسيون موجود في الصيدليات البشري بيحتوي علي ماده الايفرميكتن أسمه ايفرزين  ممكن أستخدمه مره شهريا الشامبو دا فيه نفسه الماده الفعاله بتاعه حقن الايفوماك اللي 

بتتاخد تحت الجلد بس بشري

المفروض الكلب ياخد شاور مرتين في الشهر بالشامبو ممكن نحمي مره بشامبو أيفرزين  ومره بشامبو جونسون لانه مناسب لجلد الكلاب غير كده في موسم الصيف ممكن أحمي  الكلب أكتر من مره  بماء فقط من غير اي شامبو مع تجنب انه الماء يتسرب لأذن الكلب
بعد كده المفروض اشتري أمبول أما
ريفوليوشن Revolution

سعره من 60 ل 80 جنيه
أو فرونت لاين Frontline

سعره بيكون من 100 ل 120 ويعتبر أمن المنتجات لانه عشبي
أو بارس Bars 

ودا سعره بيكون من 15 ل 25 جنيه للامبول 

ودي أغلب المنتجات اللي موجوده في السوق
وأنقط الامبول في المنطقه بين ودان الكلب لاخر الرقبه  واخد بالي كويس أنه الكلب ما يلحس المكان دا لان البارس و الريفوليوشن سامين للكلاب عكس الفرونتلاين اللي بيتكون من أعشاب فأمن حتي لو الكلب لحسه وأمن كمان في فتره الحمل للكلاب
براعي  وزن الكلب وانا باشتري أمبول الوقايه من الحشرات  يعني مثلا لو هاشتري أمبول بارس أخد بالي انه أمبول لكل 10 كيلو   لو كلبي 20 كيلو يبقي هاشتري أمبولين وأحطهم له 
  شهريا المفروض الكلب ياخد أمبول وقايه من الحشرات وجرعه من الأدويه المضاده للديدان


طيب لو كلبي وصل لحاله زي اللي موجوده في الصوره دي أعمل أيه :

لازم هنا أخد كلبي للدكتور البيطري فورا  اللي غالبا هيستخدم بروتوكول معين لعلاج الكلب , هنا الكلب أكيد هيكون بيهرش جامد وبيحاول يقطع جلده بسبب افراز الهيستامين وحساسيه الكلب من الحشرات كمان في أحتماليه كبيره أنه يكون جلد الكلب اتصاب بالتهاب   بكتيري  وحاله زي قراد الودان دي ممكن تكون أتطورت وسببت ألتهاب للأذن من الداخل وأنفجار للأوعيه الدمويه وتوصل لمرحله ال aural Haematoma

,اللي فيها بيحصل تجلط للدم داخل الاذن وتكوين كتله لو محصلش تدخل جراحي سريع لمعالجتها ممكن تؤدي لتغير شكل الأذن او اللي بنسميه cauliflower Ear

وبالتالي الطبيب البيطري هيكون أفضل حد يعرف يعالج الكلب خاصه وأن العلاج هنا هيبقي معتمد علي اكتر من وسيله عشان الكلب يرجع للحاله الصحيه بتاعته , يعني الطبيب البيطري هيركز علي طرق للتخلص من الحشرات اللي علي جسم كلبك نهائيا وطرق لرفع مناعته وطرق لمنع الاصابات البكتيريه والاصابات بالديدان كمان هيهتم بانه يكتبلك نظام تغذيه مناسب للكلب عشان يعالج فقرالدم والانيميا اللي حصلت وبالتالي متحاولش تعالج الكلب لوحدك في حالات زي دي عشان هيكون صعب جدا عليك وألجا لاقرب دكتور بيطري عشان يساعدك  

سواء الكلب عنده حشرات وقراد قليل أو كتير علي جسمه لازم أهتم بتنضيف المكان بتاعه والبيئه اللي عايش فيها بشكل منتظم 
ودي ممكن أعملها  بطرق سهله زي :

استخدام المكنسة الكهربائية في الأرضيات والسجاد والكنب والسراير مهم جدا. التنفيض لوحده لا يكفي لأنهم عندهم قدرة إنهم يمسكوا في الأقمشة والسجاد بشدة. المكنسة هي الحل ولكن احذر أن الحشرات دي عندها قدرة إنها تزحف تاني جوه بيتك من المكنسة

:لذلك قبل بداية عملية التنظيف بالمكنسة ننصح إنك تضع في قلبها أي من الاتي لضمان قتل الحشرات بعد كنسها

طوق للحشرات. من أي محل لمستلزامات الحيوانات 

ملح سفرة. القراد والبراغيث بيحبوا الرطوبة ولا يستطيعوا البقاء في مكان جاف. الملح بيعمل عملية تجفيف طبيعية وبيمتص الرطوبة من أي شيء وكمان قاتل للحشرات الطفيلية

بودرة قاتلة للحشرات الزاحفة أو الحشرات الطفيلية

عليك تفريغ محتويات المكنسة بشكل دوري خارج المنزل. ممكن في البلكونة أو الحديقة. ضع المحتويات المفرغة من المكنسة في كيس زبالة واقفله جيدا وتخلص منه

استخدم الديتول كبديل للمبيد :  الديتول قاتل للحشرات الطفيلية مثل القراد والبراغيث. هو حل كيميائي لكن أكيد ضرره أقل بكثير من المبيدات السامة مثل الديازينون. املأ عبوة رشاشة بنص ديتول ونص ماء. قوم بالرش تحت الأثاث وفي أركان المنزل و على الستائر كل يومين. الموضوع كله مش هياخد أكثر من ربع ساعة من وقتك. راعي إنك لاتقوم بالرش في الأماكن اللي كلبك ممكن يوصلها أو يلحسها

ملحوظة: الديتول مادة كيميائية منظفة ولا يمكن استخدامه على كلبك وعليك توخي الحذر إن كلبك مايلحسهوش

استخدام الخل في مسح وتنظيف الأرضيات

ننصح بعد الكنس بالمكنسة الكهربائية مسح الأرضيات جيدا بإستخدام ماء دافئ مع كوب من الخل لأنه طارد قوي للحشرات وآمن للأطفال والحيوانات. وبعد كده سيب شباك مفتوح نص ساعة للتهوية ولتجفيف الأرض

غسيل السجاد و المفروشات والستائر بشكل دوري على الأقل مرة في الشهر. لو حاسس إن فيهم حشرات وقلقان يمكنك رشهم بمبيد  قبل الغسيل بيوم خارج البيت في البلكونة مثلا لضمان قتل أي حشرات.  اقرأ مكونات المبيد وابحث مدى خطورته على الإنترنت قبل الإستخدام. بعدها قم بالغسيل بالماء الدافئ والكثير من الصابون لضمان التنظيف الجيد والتخلص من بواقي المبيدات حفاظا على سلامة أسرتك

غسيل سرير وبطانية كلبك مهم  بشكل دوري في الغسالة بماء دافئ وصابون. يفضل الغسيل على الأقل مرة كل أسبوع

نصيحة هامة : لو شاكك إن كلبك بلع أي حاجة سامة من مبيدات أو منظفات وشفت عليه اعراض زي القيء و الإسهال المزمن أو الارتعاش أو افراز زائد في اللعاب عليك بالآتي

في زجاجة أو وعاء قم بإذابة أقراص فحم في ماء بمقدار قرص لكل معلقتين صغيرتين من الماء وتدي للكلب معلقة صغيرة من هذا المحلول لكل كيلو جرام من وزنه ثم عدد 2 كوب ماء للشرب. المحلول ده يؤجل امتصاص الجسم للكيماويات أو السموم لكنه لن يوقفه. ده اسعاف أولي سريع تعمله على ماتوصل للطبيب البيطري

المراجع اللي أتكتب منها المقاله : 

http://thedogsnetwork.com/2015/07/%d8%a7%d8%b2%d8%a7%d9%8a-%d8%aa%d8%b9%d8%a7%d9%84%d8%ac-%d9%83%d9%84%d8%a8%d9%83-%d9%85%d9%86-%d8%a7%d9%84%d9%82%d8%b1%d8%a7%d8%af-%d9%88%d8%a7%d9%84%d8%a8%d8%b1%d8%a7%d8%ba%d9%8a%d8%ab/

https://www.facebook.com/K.zkennel/posts/301514826697562

http://thedogsnetwork.com/2015/07/%d9%83%d9%8a%d9%81%d9%8a%d8%a9-%d8%aa%d8%b7%d9%87%d9%8a%d8%b1-%d8%a8%d9%8a%d8%aa%d9%83-%d9%85%d9%86-%d8%a7%d9%84%d9%82%d8%b1%d8%a7%d8%af-%d9%88%d8%a7%d9%84%d8%a8%d8%b1%d8%a7%d8%ba%d

9%8a%d8%ab/

http://www.vetwest.com.au/pet-library/aural-haematomas-in-dogs-ears